Whistler - fascht wie bi eus ih dä Berge...

Im Moment hämmer da ja würklich dä Rege wo eus profezeit worde isch. Es chömed Bindfäde obe abe, es isch grau, alles isch zue und es isch uh frisch. Aber es git ja nur schlechti Chleider. Da hemmer eus doch gseit, dass mer doch dä Usflug uf Whistler mached und evtl. ja Glück händ, dass es dört eh chli besser isch.
Drum simmer denn hüt am Morge au scho ganz früeh los - zwei Kolleginne vo dä Schuel, eini us Venezuela und die ander us Brasilie. Am 7.15 Uhr isch Träffpunkt gsii am Busbahnhof. Da han ich doch am 6.20 h müese us em Huus, dass ich denn pünktlich dört gsii bin, denn so Busbahnhöf sind immer schwierig mit dä ÖVs zerreiche am Morge früh.
dSchlange am Schalter isch ganz chli gsii und so hemmer eusi Tickets schnell becho. Wemmer dStudentecharte zeiged hät, sogar nah zum Halbepris... nied schlecht.
Nach dä achte isch denn dä Bus los braused Richtig Whistler. dFahrt isch dur Wälder gange und dä Berge entlag. Wemmer nied gwüsst hät wommer isch... mer hätti chöne glaube, dass mer ih dä Schwiiz isch.
Nach 2,5 Stunde simmer denn dört ihtroffe und händ die erste Föteli gschosse... leider au nied bi guetem Wetter. Es isch grau und nisgelig gsii und vor allem ganz fescht Berg frisch, brrr.
Mir sind denn durs Dörfli glaufe und mer hät sGfühl gha, es isch wie in Davos, Arosa oder Zermatt - würklich wie bi eus.
Es sind ganz viel Biker - au bi dem Wetter - unterwegs gsii. Es git en Sessellift wo die ihri Bikes druf tüend und ufe fahred. Nachher fahreds über Stock, Stei und Schanzene de Hang abe... isch es richtigs Schauspiel zum zueluege. Und - vor allem sind's nachher uh dräckig gsii.
Gross isch Whistler nied - es gliecht ah meh Kurort ih dä Schwiiz und isch recht touristisch. Mir sind denn fein go lunchlä und denn isch Ziit au scho bald wieder ume gsii, denn am vieri hemmer wieder biem Busbahnhofe müese sii...

Whistler: ist ein Ort in der Region Whistler-Blackcomb, eines renommierten Skigebietes im Westen von Kanada, etwa 115 km nordöstlich von Vancouver, British Columbia, gelegen. Die Region ist nach den beiden Bergen Whistler Mountain und Blackcomb Peak benannt. Im Sommer bieten sich viele Möglichkeiten für Touren mit dem Mountain Bike und andere Aktivitäten an. Whistler ist wegen seiner Schneesicherheit ein beliebter Wintersportort.

















Nach eusem Usflug simmer denn nah id Downtown Vancouver is "The Famous Warehouse" (Pub) gange. Dört hemmer denn nah dä Hockeymatch Vancouver Canucks gäg Los Angeles Kingsahglueded glueged. Isch uh spannänd wie fanatisch die Kanadier da sind. Wenn's denn au nah Dähei spieläd, denn gaht da Richtig Poscht ab und es isch eh super Stimmig, wenn dä Schlussstand nied 1:1 gsii wäri, denn Vancouver isch ih dä zweitä Hälfti am führe gsii.